Áššehasbálvalus

Sáhtát váldit oktavuođa ovttaveardásašvuođaáittardeaddjái:

  • Vealaheapmái guoski áššis deavdimiin oktavuođaváldinskovi
  • Sáddemiin šleađgapoastta yvv(at)oikeus.fi
  • Riŋgemiin gohcimii
  • Gohcin lea rabas disdaga ja duorastaga dmu 10 - 12: 0295 666 817 
  • Sáddemiin reivve
  • Chatas mánnodaga ja gaskavahku dmu 13-15 ja bearjadaga dmu 10-12 (fierbmesiidduineamet)
  • Persovnnalaš deaivvadeamis galgá álo soahpat sierra

Ovttaveardásašvuođaáittardeaddji doaimmahat bálvala du suoma-, ruoŧa- ja eaŋgalasgillii. Sáhtát dárbbu mielde leat oktavuođas maid eará gillii. Doaimmahaga bálvalusat leat nuvttá. Ovttaveardásašvuođaáittardeaddji bargiin lea čiegusindoallangeatnegasvuohta ovdamearkka dihte priváhttaeallimii laktáseaddji rašes áššiid oasil.

Riŋgedettiinat midjiide, riŋgemis šaddet dutnje dábálaš golut telefonsoahpamuša mielde. Riŋgemis ii dárbbaš máksit sierra bálvalanmávssu. Juos bivdojuvvo, sáhttit maid riŋget dutnje ruovttoluotta.

Go áššát guoská vealaheapmái

Ovttaveardásašvuođaáittardeaddjái sáhttá váldit oktavuođa, juos lea deaivan dahje áican vealaheami. Ovttaveardásašvuođaáittardeaddji addá neavvagiid ja rávvagiid, ja sáhttá veahkehit vealahaneahpádusa čielggadeamis.

Sáhtát váldit oktavuođa ovttaveardásašvuođaáittardeaddjái, juos leat vásihan dahje áican vealaheami, agi, riegádanduogáža, riikkavulošvuođa, giela, oskku, nana jáhku, oaivila, politihkalaš doaimma, ámmátsearvedoaimma, bearašgaskavuođaid, dearvvašvuođadili, lámisvuođa, seksuála orientašuvnna dahje olbmui laktáseaddji eará siva vuođul.

Sáhtát váldit oktavuođa maid vealaheami vásihan olbmo dahje joavkku beales.

Go lea dárbu, áittardeaddji álggaha doaibmabijuid veahkehan dihte vealaheami gillájeaddji. Sáhtát lohkat dáppe ovttaveardásašvuođaáittardeaddji vugiin darvánit vealaheapmái.

Go válddát oktavuođa ovttaveardásašvuođaáittardeaddjái vealaheapmái laktáseaddji áššis

Váldoáššis ovttaveardásašvuođaáittardeaddji fállan vuoigatvuođalaš veahkki lea rávven ja bagadallan.

Go ovttaveardásašvuođaáittardeaddji vuostáiváldá oktavuođaváldima vealaheamis, árvvoštallojuvvo vuos, šaddágo dáhpáhusas vealahannavddus, dahjege sáhttágo dáhpáhusas leat sáhka ovttaveardásašvuođalága vuostásaš vealaheamis. 

Áittardeaddjis lea viiddes guorahallanváldi mearridit, guđe doaibmabijut álggahuvvojit ovttaskas oktavuođaváldima vuođul. Áittardeaddji vástida goittotge buot čálalaččat boahtán vealahanoktavuođaváldimiidda. Álkimusat dilli sáhttá čoavdašuvvat telefovnnain dahje šleađgapoasttain.  Vihkkedaladettiinis doaibmabijuidis áittardeaddji váldá vuhtii earret eará mot indiviida beassá vuoigatvuođaidasas beaktileamos ja vuogálaččamus vugiin ja vuhtiiváldá gieđahallanvuloš ášši servodatlaš mearkkašumi. 

Oktavuođaváldin áittardeaddjái ii buhtte eará njulgen- ja rievdadusohcanmeannudemiid, mat vejolaččat geavahuvvojit. Juos ovdamearkka dihte gieldi mearrádussii sáhttá ohcat rievdadusa, dán berrešii bargat ovdal, go váldá oktavuođa áittardeaddjái. Juos leat juo váldán oktavuođa nuppi eiseváldái, amma válddát vuhtii, ahte eat váldoáššis gieđahala du oktavuođaváldima oktanaga eará eiseválddiiguin.

Go áššát guoská olmmošgávpái, riikkas eretgohččuma goziheapmái dahje olgoriikkalašáššiide

Ovttaveardásašvuođaáittardeaddji bargguide gullá maid gozihit riikkas eretgohččuma ja olgoriikkalaččaid sajádaga ja vuoigatvuođaid. Ovttaveardásašvuođaáittardeaddji bargá maid našuvnnalaš olmmošgávperaporterejeaddjin. Dáin áššiin áittardeaddji doaibmá eará ládje go vealaheapmái darváneamis iige ovttaveardásašvuođaáittardeaddji bargga áššehasbálvalanbarggu riikkas eretgohččuma goziheaddjin dahje olmmošgávperaporterejeaddjin. 

  • Olmmošgávpái laktáseaddji áššiin sáhtát váldit oktavuođa šleađgapoasttain yvv(at)oikeus.fi

Olmmošgávppi gillájeaddjis lea vuoigatvuohta oažžut veahki olmmošgávppi gillájeddjiid veahkehanvuogádagas: http://www.ihmiskauppa.fi/ 

Olmmošgávppi gillájeddjiide veahki fállet maid máŋggat searvvit, degomat Rikosuhripäivystys (Rihkusgillájeaddjigoziheapmi), Pakolaisneuvonta (Báhtareaddjirávven), Pro-tukipiste (Pro-doarjjabáiki)  ja Monika-Naiset lihttu rs (Monika-Nissonat).

  • Riikkas eretgohččuma goziheapmái laktáseaddji áššiin sáhtát váldit oktavuođa šleađgapoasttain [email protected]
  • Olgoriikkalašáššiin sáhtát váldit oktavuođa šleađgapoasttain [email protected]